Ferme pour du Jehan du Lys, 1466

Ledict jour (samedi 16 septembre 1466. - Courtin, notaire).

Noble homme Jehan du Lis, escuier, en son nom, d’une part ; et Guillaume Godart, escuier, ou nom comme soy disant avoir la garde, administracion et gouvernement des enffens deffunct Jehan de Vérines (sic), en son vivant escuier, d’autre part ; lesquelles parties, ès noms et qualitez que dessus, recongnurent et confessèrent que touchant certains procès, délais et questions que les parties ont l’un contre l’autre, à l’occasion de certaines rentes que ledit du Lis prétend avoir sur le lieu de La Goislière ; lesdictes parties, esdits noms, pour bien de paix, se sont soubmiz et condescendus au dit, ordonnance et arbitrage de noble homme Guérin de Groin, bailli de Saint-Pierre-le-Moustier ; audit arbitrage duquel lesdictes parties promectent acquiescer et tenir tout ce qu’il discutera et déterminera de leur dit procès et questions, sans aucune figure de procès ; et durera ce présent arbitrage jusques à six mois prochains venans. Promectent, etc.