Don fait par Jehan du Lys à sa nièce Jehanne Marescot, 1484

Minutes de Jean Courtin, notaire. Étude de Me Paillat à Orléans.

 

Ledict jour samedi 31 juillet (1484)

 

Noble homme Jehau du Lis, escuier, seigneur de Baignault, lequel, pour demourer quicte envers Jehanne, sa niepce, fille de feu Jehan Marescot, jadis escuier, demourant à Ardon, et de Perrette de Vézines, jadis sa femme; des saillères et services que ladicte fille a fait et gaigniez avec ledit du Lis, son oncle, de tout le temps qu’elle a demouré en sa maison jusqu’à huy ; aussi pour la grant amour et affection naturelle que a à sadicte niepce et pour aider à la marier ; pour ces causes et autres à ce le mouvans, donne, transporte et délaisse à ladicte Jehanne sa niepce, présent et acceptant, la somme de xliiij frans xx deniers parisis que doit audit du Lis la dicte Perrette de Vasines (sic), mère de ladicte fille, pour faire compte fait entre eulx de toutes choses quelconques en quoy ladicte Perrette pourroit estre tenue audit du Lis, tant de près que autrement, jusques à hui, ainsi que ledit du Lis et ladicte Perrette, à ce présens, disoient. Avec ce, lui transporte tous les droits et actions qui en deppendent. Ledit don et transport fait pour les causes que dessus, et ainsi que ladicte Perrette et ladicte fille quictent et promectent acquicter ledict du Lis des services que lui a fait ladicte fille de tout le temps passé, jusques à huy. Et partant dudict debt s’est dessaisy.

 

En marge : Délivré par extrait au sieur du Lis, advocat général du roy en sa cour de ses aydes, à Paris, ce vingt et ungnième jour de juillet.