Tumulte à Serqueux en Champagne, pour le payement d’une dette contractée par Pierre du Lys, 1439

Pièce inédite du Trésor des chartes (J, 177, n° 45).

Charles, etc. Savoir faisons à tous présens et avenir, nous avoir receu l'umble supplicacion de Nicolas de Verrecourt, jeune compaignon de guerre, natif du lieu de Verrecourt ou bailliage de Chaumont en Bassigny, contenant que, tout son temps et mesmement depuis qu'il se congnoist, il nous a servy à l'encontre de noz adversaires, tant en la compaignie de feu Philibert de Brecy, en son vivant chevalier, que autrement, et y a employé son corps, son temps et ses biens. Et lui estant avec ledit feu de Brecy, advint que Pierre Dalix, chevallier, frère de Jehanne la Pucelle, auquel avions lors baillé le proufit et revenue de noz haulx passaiges en nostre dit bailliaige de Chaumont, bailla audit feu de Brecy, par manière de gaigière, ce que povoit devoir la ville de Serqueulx en nostre prevosté de Montigny, à cause desdiz haulx passaiges, pour certaine somme de deniers que ledit Dalix lui devoit pour prest à lui fait par icellui de Brecy, pour lui aidier à paier sa finance au bastard de Vergey qui le tenoit prisonnier ; laquelle ville de Serqueulx et les habitans d'icelle furent reffusans de paier audit de Brecy ce qu'ilz lui devoient à certain terme lors escheu ; et pour ce que lesditz habitans, après plusieurs longues sommacions à eulx faictes par ledit feu de Brecy, furent tousjours reffusans de paier ledit de Brecy, en l'an mil cccc xxxix ou environ, commanda audit suppliant et trois ou quatre autres compaignons de guerre, ses serviteurs, qu'ilz alassent audit lieu de Serqueulx et qu'ilz preissent et gaigeassent lesdiz habitans de leurs biens pour sondit paiement. Lesquelz diz suppliant et autres, en obéissant au commandement de leurdit maistre, alèrent audit lieu de Serqueulx où ilz prindrent certains chevaulx, bestail et autres biens, lesquelz ilz enmenoient et s'en retournoient devers leur dit maistre sans faire mal à personne ; mais les habitans dudit Serqueulx saillirent dudit lieu armez et embastonnez, et vindrent audit suppliant et autres compaignons de guerre cryans : « A mort aux trahistres ! ilz seront penduz. » Et leur coururent sus et par espécial audit suppliant, et se mirent en tout effort de leur faire et porter dommaige et de les tuer. Et quant icellui suppliant vit que on les pressoit, et pourceque lesdiz habitans durant les guerres avoient esté contraires et portaient toute hayne audit suppliant et sesdiz compaignons, qui toutes leurs vies avoient esté en nostre service, doubtant cheoir en leur mercy, se mist en deffense contre aucuns desdiz habitans qui fort le pressoyent ; et en soy deffendant ledit suppliant frappa d'une lance qu'il tenoit ung nommé Jehan Landrey dudit lieu de Serqueulx, par la teste ou autre part, tellement que mort s'en ensuy en la personne dudit Landrey. Pour occasion duquel cas icellui suppliant se absenta du pays, etc ... , et n'oseroit jamais retourner ne seurement demourer en nostre royaume, se noz grâce et miséricorde ne lui estoient sur ce imparties, comme il nous a fait dire et remonstrer, etc. etc. Pour ce est il que nous, considéré ce que dit est, voulons miséricorde préférer à rigueur de justice, audit Nicolas de Verrecourt, suppliant, avons quicté, remis et pardonné, quictons remectons et pardonnons de grâce especial, plaine puissance et auctorité royal, par ces présentes, les faiz et cas dessusdiz, etc. etc. Donné à Saint-Mihiel eu Barrois, le xxiiic jour de may, l'an de grâce mil CCCC XLV et de nostre règne le xxiiie.

Ainsi signé : Par le roy en son conseil, Delaloere.

Visa, contenter. P. Le Picart.